تعليق مثير من أحمد شوبير عن صفقات الزمالك:«مفيش الهيصة بتاعت كل سنة»

تحدث الإعلامي أحمد شوبير، حارس النادي الأهلي ومنتخب مصر السابق، اليوم الخميس، عن موسم الانتقالات الذي يجرى داخل نادي الزمالك، خلال الفترة الجارية.

ونجح نادي الزمالك في استقطاب عدد من الصفقات المميزة، أبرزها الحارس مهدي سليمان من الاتحاد السكندري واللاعبان أحمد شريف وعمرو ناصر من فاركو، وإستريلا دا أمادورا البرتغالي وذلك لتدعيم صفوف القلعة البيضاء، قبل بداية الموسم الجديد.

وقال أحمد شوبير في تصريحات إذاعية:« الحقيقة فيه حاجة عاجبني في الزمالك تحس السنة دي كده فيه حالة من الهدوء وحالة من الصمت الطيب المطلوب، لإن أحيانا الصمت بيكون مطلوب مفيش الهيصة والدوشة اللي بتبقى موجودة كل سنة عند الزمالك».

وأضاف شوبير: «الناس كل شوية بتعلن عن كل صفقة بهدوء، وكمان بدأت تمشي لاعيبة برضه في هدوء من غير زيطة».

واستكمل: «بص اختلف مع أشخاص زي ما أنت عايز لكن في النهاية لما بتتكلم على كيان زي نادي الزمالك لازم يكون له احترامه كانت المشكلة دائما وأبدا إن الهيصة بتيجي من قلب الناس المسؤولة داخل نادي الزمالك هما اللي بيعملوا لك أزمة ويعمل لك مشكلة، وبالتالي وصلوا الزمالك إنه يبدأ كل موسم بهيصة ومش عارف اللاعيبة أيه ومين مشي ومين قعد، لكن أهم ما يميز الزمالك في المرحلة دي الهدوء الشديد جدا».

واختتم: «تخيل أنت قاعد في بيتك وكل شوية رزع وهبد هتعرف تشتغل، ولا لما تكون الدنيا هادية وبتسمع موسيقا، بالتأكيد بتفرق، فما بالك لما تكون بتشتغل ومصر كلها بتتكلم عليك وحواليك فالعمل في هدوء وصمت بداية النجاح».